Nëse ke vendosur ndonjëherë një unazë në gishtin e mesit (veçanërisht prej floriri) dhe më pas të është dukur sikur je më i/e stresuar, më i/e lodhur apo më “i/e ngarkuar” se zakonisht s’është rastësi, të paktën sipas astrologjisë.
Në shumë kultura, bizhuteritë nuk janë thjesht për bukuri. Janë të lidhura me energji, planete dhe ndikime që shkojnë përtej stilit. Sipas astrologjisë vedike dhe disa sistemeve të tjera energjie, çdo gisht në dorë përfaqëson një planet dhe një aspekt të jetës sonë. Dhe gishtin e mesit e ka “zënë” Saturni.
Po çfarë ndodh kur e kombinon arin me Saturnin?
Ari është metal i fuqishëm, i lidhur me Diellin, përfaqësues i energjisë pozitive, suksesit dhe vetëbesimit. Ndërsa Saturni? E po, është planeti i disiplinës, përgjegjësisë, karmës dhe gjithë atij tensioni që na bën të mbingarkuar emocionalisht.
Kur vendos një unazë ari në gishtin e mesit, sipas këtyre besimeve, ti pa dashje po përplas energjinë e ndritshme të Diellit me strukturën e hekurt të Saturnit dhe rezultati? Stres, vendime të vështira dhe ngecje financiare.
Energjia shkon aty ku vëmendja… dhe unaza
Ky gisht ndikon në balancën tënde të brendshme, mënyrën si e menaxhon presionin, dhe sa lehtë (ose jo) merr vendime të mëdha. Një unazë ari këtu, sipas këtyre teorive, mund të ndikojë negativisht në vetëbesimin dhe rrjedhën e pasurisë sepse gishtat që ndihmojnë më shumë në aspektin financiar janë treguesi dhe gishti i unazës.
Po me unaza të tjera ç’bëhet?
Përveç arit, edhe metalet e tjera duhen vendosur me kujdes sipas energjisë që mbartin: argjendi, që lidhet me Hënën dhe qetësinë emocionale, preferohet në gishtin e vogël ose atë të unazës.
Bakri, që përfaqëson energjinë e Marsit, shkon më mirë në gishtin tregues ose të vogël, por duhet shmangur në të mesit pasi mund të rrisë nervozizmin; ndërsa çeliku ose hekuri, që lidhen natyrshëm me Saturnin, janë ideale për gishtin e mesit, duke ndihmuar në balancimin e energjisë së tij.
Pra, materiali dhe gishti duhet të përputhen për të ruajtur harmoninë energjetike.
Atëherë, ku ta vëmë unazën?
Nëse do të përfitosh maksimumin nga energjia e arit dhe Diellit, astrologët sugjerojnë:
– Vëre në gishtin e unazës: lidhet me dashurinë, krijimtarinë dhe vetëshprehjen.
– Ose në gishtin tregues, që aktivizon energjinë e Jupiterit: planet i bollëkut, zgjerimit dhe suksesit.
Nuk po të themi të heqësh dorë nga stili yt apo të ndryshosh gjithë koleksionin e bizhuterive. Por nëse ndihesh i/e “rënduar” emocionalisht, financat s’po ecin dhe ke një unazë të artë në gishtin e mesit… ndoshta s’do ishte keq të provosh ta zhvendosësh. Në fund të fundit unaza është e jotja, por energjia… hmmm, ajo do pak menaxhim.