Programi për Vlerësimin Ndërkombëtar të Studentëve (PISA) ka publikuar rezultatet përfundimtare të testimeve të vitit 2025, ku Shqipëria u rendit në vendin e 69-të nga 80 vende pjesëmarrëse. Testimet u zhvilluan për nxënës 15-vjeçarë dhe vlerësuan performancën e tyre në tre fusha kryesore: gjuhë & letërsi, matematikë dhe shkencë.
Rezultatet e dobëta rikthyen vëmendjen te problemet e thella që po përjeton sistemi arsimor shqiptar. Sipas të dhënave të Bankës Botërore, rreth 60% e të rinjve shqiptarë konsiderohen analfabetë funksionalë, veçanërisht në lëndët e shkencave ekzakte — një përqindje gati trefish më e lartë se mesatarja e vendeve të Bashkimit Evropian dhe dyfish më e lartë krahasuar me Serbinë.
Studiues të fushës kanë theksuar se performanca e nxënësve në testime ka qenë “shqetësuese”, duke raportuar raste ku nxënësit dorëzonin fletët e provimit pothuajse bosh. Ekspertët e arsimit theksojnë se këto rezultate janë tregues i mangësive të vazhdueshme në cilësinë e mësimdhënies, mungesës së teksteve të përditësuara dhe përgatitjes së pamjaftueshme të mësuesve.
Shqipëria është renditur ndër vendet e fundit pothuajse çdo vit pjesëmarrjeje në PISA, duke bërë që standardet arsimore në vend të konsiderohen larg niveleve të pranuara ndërkombëtarisht.
Rezultatet e këtij viti pritet të nxisin diskutime të reja mbi reformimin urgjent të sistemit arsimor dhe rritjen e investimeve për të përmirësuar cilësinë e të nxënit dhe aftësitë e të rinjve shqiptarë.