Sean “Diddy” Combs është zyrtarisht i dënuar. Gjykata amerikane i ka dhënë artistit 50 muaj burg (rreth 4 vite) për dy akuza të lidhura me Akti Mann, që ndalon transportimin me qëllim prostitucioni. Përveç burgut, ai do të duhet të paguajë edhe një gjobë maksimale prej 500 mijë dollarësh.
Në vendimin e lexuar nga gjykatësi Arun Subramanian, u theksua se dënimi lidhet vetëm me shkeljen e Aktit Mann dhe jo me akuzat e mëparshme për trafikim seksual dhe mashtrim për para, të cilat u rrëzuan gjatë seancës së korrikut.
Subramanian pranoi se Combs është “një artist dhe biznesmen self-made që ka frymëzuar komunitete”, por theksoi se “një historik me vepra të mira nuk mund të fshijë pushtetin dhe kontrollin që ai ka ushtruar mbi gratë që pretendonte se i donte”.
Gjykatësi përmendi me tone të forta dëshmitë e Cassie Ventura dhe një gruaje tjetër, Jane, duke kujtuar videot, mesazhet dhe provat që dokumentonin dhunën: “Pamë fotot e mavijosjeve, dyert e thyera, pamë videon e rrahjes së dhunshme të Ventura”.
Ai shtoi se dënimi është një mesazh i qartë për abuzuesit dhe viktimat, se askush nuk është mbi ligjin:
“Abuzimi ndaj grave përgjigjet me përgjegjësi të plotë. Ka dritë në fund të tunelit, por ajo kalon nga drejtësia.”
Në përfundim, Subramanian falënderoi publikisht viktimat për guximin e tyre:
“Ju folët për miliona gra që janë ndjerë të padukshme. Sot, zëri juaj u dëgjua.”
Combs, sipas gjykatësit, do të përballet me një “periudhë të vështirë larg familjes”, por pas dënimit “do të ketë një jetë për të rindërtuar”.