Kryeministri Edi Rama ka ironizuar punën e bërë deri më sot nga Policia e Shtetit, duke thënë se shpesh ka qenë më shumë pjesë e problemit sesa e zgjidhjes.
“Se ku e gjenin atë kriminelin në majë të Dajtit, ndërkohë këtu në mes të Tiranës, katet pa leje,” – u shpreh Rama gjatë prezantimit të Ministres së Brendshme, Albana Koçiu.
Kreu i qeverisë tha se tashmë është përmbyllur marrëveshja me Emiratet e Bashkuara Arabe për transformimin teknologjik të sigurisë në vend. Sipas tij, kjo marrëveshje do të sjellë qytete inteligjente, mbulim me kamera të rrugëve, shkollave dhe madje edhe klasave, duke ofruar një nivel sigurie të standardeve europiane.
“Na janë dashur muaj të tërë që mund të mbushnin edhe vitin për të konkluduar marrëveshjen më të rëndësishme për sigurinë. Do kemi qytete inteligjente, mbulim me kamera inteligjente tërësor nga rrugët te shkollat, brenda klasës, për të na dhënë një nivel sigurie të standardit më të lartë europian,” – deklaroi Rama.
Ai shtoi se sistemi i ri do të eliminojë incidentet dhe përplasjet në ambientet shkollore:
“S’do ketë më historira sa thika ishin, apo kush i ra i pari me shpullë tjetrit, se pastaj kalon në shkulje flokësh mes prindit e mësuesit. Survejim ajror me dronë inteligjentë!”
Rama theksoi se ministrja e re e Brendshme, Albana Koçiu, do të ketë rol udhëheqës në zbatimin e këtij projekti.