Elizabeth I, Mbretëresha që nuk u martua kurrë – Një vizitë që zbulon shumë
Elizabeth I, vajza e Henrit VIII, mbetet e vetmja mbretëreshë angleze që nuk u martua kurrë. Figura ikonike e dinastisë Tudor mbretëroi e vetme dhe e fuqishme, ndërsa arsyet për këtë zgjedhje kanë ngjallur gjithmonë kuriozitet. Një vizitë e veçantë në kështjellën Kenilworth, e cila ndodhi para 450 vitesh, mund të ofrojë disa të dhëna mbi këtë vendim. Sot, një instalacion artistik i ri në këtë kështjellë, që përfshin tradhti, prerje koke dhe një shpallje të stërmadhe dashurie, hedh dritë mbi historinë.
Source:BBC
Në një mbrëmje korriku të vitit 1575, Mbretëresha Elizabeth I, në moshën 41-vjeçare, mbërriti në Kenilworth Castle në Warwickshire të Anglisë. Ishte vizita e saj më e gjatë dhe e fundit në këtë vend. Ajo ia kishte dhuruar kështjellën Robert Dudley-t në vitin 1563 dhe një vit më pas i kishte dhënë titullin Konti i Leicester-it. Dudley ishte një nga njerëzit më të afërt të Mbretëreshës – besohet se kishin qenë miq që në fëmijëri, edhe pse marrëdhënia e tyre intime ishte subjekt thashethemesh të shumta në oborrin mbretëror.
Përpara ardhjes së Mbretëreshës, Dudley e kishte transformuar kështjellën në një vend përrallor. U ndërtuan godina të reja, u krijua një kopsht i mrekullueshëm dhe e gjithë prona u rregullua për t’i dhënë madhështi dhe bukuri të jashtëzakonshme. Por ajo që bëri vërtet përshtypje ishte mikpritja madhështore: muzikë, vallëzim, akrobaci, fishekzjarre spektakolare dhe shfaqje teatrale me aktorë të veshur me kostume të kohës.
Në liqenin përreth kështjellës, u ndërtua një “ishull lëvizës” ku shfaqej “Zonja e Liqenit”. Një delfin prej 7.3 metrash fshehte muzikantë brenda tij, ndërsa një sirenë notuese, 5.5 metra e gjatë, ishte pjesë e spektaklit fantastik.
Kjo vizitë në Kenilworth mendohet nga shumë historianë si përpjekja më serioze e Robert Dudley-t për të fituar dorën e Elizabethës. Por, pavarësisht ndjenjave të afërta, ajo nuk pranoi kurrë të martohej – as me të, as me askënd tjetër. Arsyeja mund të ishte politike, personale apo një përzierje e të dyjave. Mbretëresha kishte zgjedhur të ishte “e martuar me vendin e saj”.