Gjykata Themelore në Prishtinë ka shpallur sot të pafajshëm këngëtarin e njohur Asdren Gjikolli, i njohur si Gjiko, lidhur me akuzën për dhunim që ishte ngritur ndaj tij.
Sipas aktgjykimit të shpallur, gjykata ka konstatuar se nuk ka prova të mjaftueshme që e lidhin të akuzuarin me veprën penale për të cilën ishte hetuar dhe gjykuar.
Mbrojtja e Asdren Gjikollit është udhëhequr nga avokati i njohur Kujtim Kërveshi, një emër i njohur i botës juridike në Kosovë dhe më gjerë, i cili njihet për përfaqësimin e korporatave të mëdha dhe profileve të larta në çështje të ndërlikuara juridike.
Pas vendimit të Gjykatës Themelore, në lidhje me akuzat për dhunim, ka ardhur edhe reagimi publik i moderatores Elita Rudi.
Përmes një postimi emocional në Instagram, Elita ndau me ndjekësit e saj ndjenjat që ka përjetuar gjatë kësaj periudhe të vështirë, duke e përshkruar si një plagë që dhemb, por që kurrë nuk i ndau. Ajo shkroi se e vërteta që zemra e saj e dinte gjithmonë më në fund u tha edhe nga drejtësia.
“Sot mbyllet një plagë që na dhembi, por kurrë nuk na ndau. Sot u vërtetua ajo që zemra ime e ka ditë gjithmonë: ti je i pafajshëm,” – shkruan ajo, duke e cilësuar Gjikon si një forcë dhe mbështetje të vazhdueshme, edhe në momentet më të vështira.