Kavaja do të shndërrohet më 7 gusht në kryeqendrën e muzikës shqiptare, duke mirëpritur një nga eventet më të mëdha artistike të kësaj vere. Nën kujdesin e veçantë të Kryetarit të Bashkisë, Fisnik Qosja, “Kavaja Summer Night” vjen si një festë madhështore në kuadër të 250-vjetorit të themelimit të qytetit.
Mbrëmja do të shënojë edhe inaugurimin e pedonales së re, një hapësirë moderne që do të kthehet në skenën e një spektakli unik, ku historia, kultura dhe vizioni i ri i Kavajës do të bashkohen nën ritmet e muzikës.
Në skenë do të ngjiten disa nga artistët më të dashur të publikut shqiptar, mes tyre Elvana Gjata, Ledri Vula, Luiz Ejlli, Kida dhe Ardit Çuni, të cilët premtojnë një natë plot energji, emocione dhe performanca spektakolare. I gjithë koncepti artistik i eventit është kuruar nga Ardit Çuni, duke garantuar një produksion të nivelit të lartë dhe një atmosferë të paharrueshme për të gjithë të pranishmit.
Për ta bërë këtë festë sa më gjithëpërfshirëse, hyrja do të jetë falas për të gjithë qytetarët dhe vizitorët. Gjithashtu, organizatorët kanë vënë në dispozicion transport falas me autobusë nga Golemi, me nisje çdo 30 minuta duke filluar nga ora 18:30, për t’ua lehtësuar pjesëmarrjen pushuesve.
“Kavaja Summer Night” premton të jetë shumë më tepër se një koncert – një festë e madhe qytetare, që do të shënojë historinë e Kavajës dhe do të mbetet gjatë në kujtesën e të gjithë atyre që do ta përjetojnë.