Shqipëria ka hedhur një hap të rëndësishëm në rrugën e integrimit evropian, duke nisur zyrtarisht përgatitjet ligjore për adoptimin e euros si monedhë zyrtare.
Sipas një projektligji të ri “Për Bankën e Shqipërisë”, i publikuar për konsultim publik, për herë të parë përcaktohen rregullat se si do të funksionojë banka qendrore pas hyrjes së vendit në Eurozonë. Projektligji parashikon që, në momentin kur Shqipëria të anëtarësohet në Bashkimin Evropian dhe të përmbushë kriteret e nevojshme, euro do të bëhet monedha zyrtare e Republikës së Shqipërisë.
Dokumenti përcakton gjithashtu se Banka e Shqipërisë do të jetë përgjegjëse për hedhjen në qarkullim dhe tërheqjen e kartëmonedhave dhe monedhave euro, në përputhje me rregullat e Bashkimit Evropian dhe të Bankës Qendrore Evropiane. Po ashtu, ajo do të ketë të drejtën të përcaktojë edhe dizajnin e monedhave metalike euro që do të emetohen nga Shqipëria, sipas standardeve evropiane.
Megjithatë, ky zhvillim nuk nënkupton se euro do të zëvendësojë lekun në një të ardhme të afërt. Dispozitat e projektligjit do të hyjnë në fuqi vetëm pasi Shqipëria të bëhet anëtare e Bashkimit Evropian dhe të plotësojë kriteret ekonomike të kërkuara për anëtarësim në Eurozonë.
Përveç përgatitjeve për euron, projektligji synon të forcojë pavarësinë e Bankës së Shqipërisë, të përafrojë legjislacionin me standardet e Bashkimit Evropian dhe të krijojë bazën institucionale për integrimin e saj në Sistemin Evropian të Bankave Qendrore.