Një vendim i pazakontë ka ndodhur në Spanjë, ku aktorja Ana Obregón, 71 vjeçe, përmbushi dëshirën e fundit të djalit të saj të ndjerë, Álex, 27 vjeç, duke sjellë në jetë një fëmijë përmes një procesi të asistuar riprodhues.
Sipas mediave, është përdorur spermë e ngrirë e djalit të saj, një vezë e dhuruar nga një donatore, si dhe një nënë surrogate në SHBA, përmes së cilës në vitin 2023 erdhi në jetë vajza Ana Sandra.
Obregón është një nga figurat më të njohura në Spanjë, falë pjesëmarrjes në disa produksione televizive dhe filmike. Kohët e fundit ajo ka qenë sërish në qendër të vëmendjes, pasi e vogla Ana Sandra, e njohur edhe si Anita, ka mbushur tre vjeç.
Fëmija, e cila ligjërisht konsiderohet vajza e saj, është gjithashtu e lidhur biologjikisht me djalin e ndjerë të aktores, duke e bërë historinë një nga më të komentuarat në botë.
Djali i saj ndërroi jetë në vitin 2020, në moshën vetëm 27 vjeç, pas një beteje me kancerin. Para nisjes së kimioterapisë, mjekët i kishin sugjeruar të ngrinte spermën në rast se do të dëshironte fëmijë në të ardhmen.
Pak para ndarjes nga jeta, ai kishte shprehur dëshirën për t’u bërë baba. Obregón vendosi ta përmbushte këtë dëshirë, duke shkruar më vonë në Instagram:
“U betova se do të të shpëtoja nga kanceri dhe dështova. Premtova se do të sillja në botë vajzën tënde dhe tani e mbaj në krahët e mi.”