“Moda është art”. Por, siç duket, edhe politikë. Tapeti i kuq i Met Gala-s ndezi Nju Jorkun dhe faqet e mediave në mbarë botën me veshje ekstravagante dhe emra të njohur të showbiz-it, por edhe me mungesa të bujshme. Mes tyre, kryebashkiaku i Nju Jorkut Zohran Mamdani, si dhe Zendaya dhe Meryl Streep.
Arsyeja e bojkotit thuhet të jetë prania e “çiftit mbretëror” të Amazon, Jeff Bezos dhe Lauren Sánchez, financues të eventit me rreth 10 milionë dollarë dhe presidentë nderi të tij.
“Ndërsa sytë e botës janë të përqendruar te nata më e madhe e modës, ne po shohim te industria tekstile, tregtia me pakicë dhe punëtorët e magazinave që e mbajnë këtë industri në këmbë. Nga dashuria e vërtetë që lind mes protestuesve, te një shkollë qepjeje në një bodrum në Brooklyn: takojmë nju-jorkezët që e bëjnë të mundur gjithë këtë”, shkroi Mamdani në rrjetet sociale.
Rreth eventit, i cili lindi si një mbrëmje bamirësie për mbledhjen e fondeve për Institutin e Kostumeve, klima u tensionua pikërisht për shkak të pranisë së Bezos. Në qytet u shfaq një fushatë e gjerë posterash proteste, e organizuar nga grupi aktivist britanik Everyone Hates Elon (në referencë ndaj Elon Musk).
Rreth muzeut ku u mbajt ceremonia, përveç posterave, u raportua se ishin shpërndarë edhe qindra shishe me lëng të verdhë, një referencë ndaj hetimeve sipas të cilave punonjësit e magazinave të Amazon janë detyruar të urinojnë në shishe për të përballuar ritmet e punës.
Përveç kryebashkiakut dhe mungesës së disa yjeve të mëdhenj, reagime pati edhe nga Cynthia Nixon, e njohur për rolin e saj si Miranda në Sex and the City dhe ish-kandidate për guvernatore të Nju Jorkut në vitin 2018.