Një reagim i fortë është publikuar nga familjarët në llogarinë zyrtare të Sara Karajt në Instagram.
Ky reagim vjen pas një debati të fortë mes Mozës dhe Sarës, ku situata ka eskaluar deri në përfshirjen e fëmijëve të konkurrenteve, duke sjellë reagime emocionale dhe përplasje të ashpra mes tyre.
Gjatë një momenti pune në fermë, Moza iu drejtua Sarës me fjalët: “Ik në kopsht bashkë me fëmijët e tu”, deklaratë që e preku rëndë Sarën, e cila shpërtheu në lot dhe e cilësoi gjuhën e përdorur si ofenduese.
Në reagim theksohet se Sara është prekur në “pikën më të ndjeshme”, ndërsa përmendja e vazhdueshme e familjes në një reality show konsiderohet si një kufi i tejkaluar. Sipas familjarëve, përdorimi i fjalëve të rënda dhe mungesa e reflektimit për pasojat që ato sjellin nuk duhet të justifikohet si pjesë e lojës.
Ata shprehen se situata bëhet edhe më shqetësuese kur këto sjellje vijnë nga persona me ndikim, duke paralajmëruar se një qasje e tillë rrezikon të normalizojë një kulturë komunikimi problematike, ku gjithçka pranohet dhe justifikohet.
Megjithatë, në mesazhin e tyre, familjarët pranojnë se Sara është pjesë e një formati ku dinamika të forta janë të pashmangshme, por nënvizojnë se kjo nuk i jep askujt të drejtën të cenojë çështje kaq personale dhe të ndjeshme.
Në fund, reagimi vjen si një distancim i qartë nga këto forma komunikimi dhe si një thirrje për vendosjen e disa standardeve më të forta etike, duke kërkuar që situata të tilla të mos përsëriten dhe të mos normalizohen.
