Ministri i Mbrojtjes i Pakistanit, Khawaja Asif, ka thënë se tani është “luftë e hapur” midis Pakistanit dhe qeverisë talebane të Afganistanit, ndërsa raportohen shpërthime në Kabul dhe luftimet vazhdojnë përgjatë kufirit. Përshkallëzimi i fundit vjen pas javësh përleshjesh përgjatë kufirit të përbashkët të vendeve, me të dyja palët që pretendojnë se dhjetëra njerëz janë vrarë.
Orë më parë, zëdhënësi i qeverisë së talebanëve, Zabihullah Mujahid, tha se Afganistani po kryente “operacione ofensive në shkallë të gjerë” kundër ushtrisë pakistaneze “përgjatë Vijës Durand” që ndan të dy vendet.
Ministria e Mbrojtjes e Afganistanit tha se përleshjet zgjatën rreth katër orë, gjatë të cilave u përdorën armë të lehta dhe të mesme. Ajo shtoi se operacioni ushtarak u ndal në mesnatë sipas orës lokale me urdhër të shefit të shtabit afgan, i cili tha se “objektivat e specifikuara” të operacionit u arritën.
Qeveria talebane thotë se tetë luftëtarë talebanë u vranë dhe 11 u plagosën. Ajo shtoi se vrau 55 ushtarë pakistanezë dhe se pushtoi dy baza ushtarake dhe 19 poste ushtarake. Pakistani thotë se vrau 133 luftëtarë talebanë dhe se dy nga personeli i tij i sigurisë vdiqën. Sipas Afganistanit, 55 ushtarë pakistanezë u vranë, ndërsa tetë nga luftëtarët e tij vdiqën në sulme.
Vendet anembanë botës po u bëjnë thirrje palëve ndërluftuese të tregojnë përmbajtje.