Kryeministri Edi Rama zhvilloi këtë të martë një takim me zyrtarët e Bashkisë në Fier. Ky takim u mbajt në kuadër të procesit për lirimin e hapësirave publike.
Gazetarja Anila Sefa mëson nga burime se kryeministri ka kërkuar dorëheqjen e të gjithë drejtorëve të kësaj bashkie. Por sipas gazetares dorëheqja e të gjithë drejtuesve të bashkisë do të bëhet në grup, por shkarkimet do të varen nga performanca individuale e secilit.
“Të gjithë drejtuesve të drejtorive rajonale në Fier, dy nënkryetarëve të bashkisë dhe disa drejtuesve të departamenteve u është kërkuar të paraqesin dorëheqjen. Burime nga brenda takimit me kryeministrin bëjnë me dije se pritet një valë shkarkimesh pa asnjë përjashtim“, raporton gazetarja.
Kryeministri Edi Rama ka shprehur shqetësimin e tij me tone të ashpra për zaptimin e hapësirave publike dhe gjendjen e pastërtisë në qytet, duke theksuar se këto janë çështje që kërkojnë vëmendje dhe veprime të menjëhershme.
Më tej sipas asaj që raporton gazetarja Anila Sefa, kryeministri Rama është shprehur se vota e qytetarëve duhet të përkthehet në respekt për ta.
Pak ditë më parë, kryeministri Rama shkaktoi një valë shkarkimesh të të gjithë drejtorëve në Bashkinë e Vlorës pas ultimatumit për lirimin e hapësirave publike. Ky veprim erdhi si rezultat i mungesës së respektimit të kërkesave për pastrimin dhe organizimin e zonave publike në qytet.
Kryeministri ka theksuar se ky proces do të vijojë edhe në bashkitë e tjera, duke kërkuar përgjegjësi dhe rezultate konkrete nga drejtuesit lokalë.