Huma Abedin, gruaja e Alex Soros ka komentuar momentet kyçe të ceremonisë martesore në një shkrim të dedikuar nga Vogue.
Huma tregoi ç’ndodhi në dasmë duke përshkruar shkurt secilën foto të vendosur në shkrim.
Mes galerisë, shfaqet edhe foto e kryeministrit shqiptar Edi Rama dhe dhëndrit Alex Soros, për të cilën Huma thotë:
“Edi bëri një nga dollitë më të mira të mbrëmjes… përfshinte një shprehje rreth preferencës për vejushat mbi të divorcuarat. Duhej të ishe aty për ta kuptuar!”
Alex Soros, 39 vjeç, është bërë një figurë gjithnjë e më e rëndësishme në botën e donatorëve progresistë. Ai ka një doktoratë në histori dhe ka marrë në dorë financimet që më parë i menaxhonte babai i tij, George Soros, tani 94 vjeç. Alex e ka quajtur veten “më politik” se babai dhe është mjaft aktiv në rrjetet sociale.
Romanca e tij me Huma Abedin, 49 vjeç, ka tërhequr vëmendjen e shoqërisë së lartë, jo vetëm për lidhjen me Clintonët, por edhe sepse martesa e saj e mëparshme me Anthony Weiner përfundoi në mënyrë skandaloze, për shkak të skandaleve të tij seksuale online.
Çifti shpalli fejesën në korrik të vitit të kaluar. Fillimisht kishin planifikuar të martoheshin fshehurazi, por pas një feste fejese të organizuar nga Hillary Clinton në dhjetor, u bindën të bënin një dasmë tradicionale. “Mendoj se e meriton,” tha Hillary për revistën “Vogue”. “E meriton të ketë një moment të tillë.”
Festimet përfshinë edhe një ceremoni më të vogël të premten, që nderonte besimin islam të Abedin dhe trashëgiminë hebraike të Soros. Një rabin dhe një imam e udhëhoqën ceremoninë, sipas të pranishmëve.
Në dallim nga Soros, “Abedin është më e rezervuar” dhe ka preferuar të jetë larg vëmendjes. Ajo nisi punën me Hillary Clinton si praktikante në moshën 19-vjeçare dhe më pas mori role më të dukshme. Ka shkruar një kujtim në vitin 2021 dhe tani është kontribuuese në MSNBC.
Martesa e tyre i pozicionon si një “çift politik me ndikim”, që pritet të mbetet në qendër të vëmendjes publike.
Source: Vogue