Heroi i ri, 19 vjeçari Jovan Kostadinov, i cili shpëtoi më shumë se 20 të rinj gjatë zjarrit tragjik që shpërtheu në diskotekën e Koçanit, është në gjendje të mirë dhe është kthyer në shtëpi. Ai nga shokët e klasës në gjimnazin “Vanço Prqe” në Vinicë u prit me pankarta mirënjohjeje për sakrificën dhe guximin e tij, si dhe me duartrokitje.
Jovani, duke hyrë e dalë nga zjarri për të shpëtuar sa më shumë njerëz e rrezikoi jetën, pa patur frikë nga flakët. Plagët në trupin e Jovanit flasin për heroizmin e jashtëzakonshëm që duhet të jetë shembull për të gjithë ne.
Ai lagu bluzen e tij me ujin qe gjeti ne nje shtepi ne afersi , e lidhi mbi goje dhe hunde dhe filloi misionin e tij te shpetimit duke hyre brenda ne diskoteke dhe duke ndihmuar te tjeret te dilnin.
Ministri i Shëndetësisë, Arben Taravari ka njoftuar se është lëshuar nga spitali Jovan Kostadinov, djaloshi që shpëtoi mbi 21 persona natën e kobshme në diskotekën “Puls” në Koçan.
Taravari shkruan se 19-vjeçari tashmë është hero i gjithë vendit.
“Sot, me emocion të thellë dhe krenari të pafund, ndaj me ju lajmin se më në fund është rikthyer në shtëpi Jovan Kostadinov, i riu trim që shpëtoi 21 jetë në tragjedinë e zjarrit të Koçanit.
Ka raste kur fjalët nuk mjaftojnë dhe kjo është një prej tyre. Si të përshkruhet një shpirt kaq trim dhe vetëmohues, që në momente paniku dhe rreziku nuk mendonte për veten, por vetëm për të tjerët?
Jovani, i cili është vetëm 19 vjeç, veproi si një hero i vërtetë. Ai hyri përsëri dhe përsëri, jo një herë, jo dy, por më shumë se 20 herë, për të ndihmuar të bllokuarit në flakë. Ai rrezikoi jetën e tij për të shpëtuar të tjerët.
Trupi i tij mban plagët e heroizmit të tij, por zemra e tij mbart diçka shumë më të madhe: respektin, admirimin dhe dashurinë e një kombi të tërë.
Jovani nuk është vetëm një hero i Koçanit. Ai është një hero i gjithë vendit tonë. Një simbol i asaj që do të thotë të vendosësh njerëzimin mbi frikën. Një kujtesë për të gjithë ne se sa shumë mund të bëjë një person me zemër të madhe”, shkruan Taravari.