Pak ditë më parë, rap-artisti i njohur shqiptar, Noizy, mbajti koncertin “Alpha Show III”.
Në një postim të fundit në rrjetet sociale, Noizy zbuloi se në koncert ishin të pranishëm plot 22 mijë njerëz. Ai pranoi se kishte disa probleme teknike, por nuk e konsideroi koncertin të dështuar. Rigels Rajku u tha fansave se mund të organizojë një tjetër koncert në gusht.
“Flasim pak për Alpha Show III dhe për këto statuset që e quajnë një dështim. Nuk mund të jetë dështim një koncert ku u shitën më shumë se 22 mijë bileta. Është shumë e thjeshtë të vërtetohet sepse kompania që merret me biletat mund të japë shifrat ekzakte,” shprehet ai.
Reperi theksoi se kishte disa gabime, duke përmendur vendosjen e skenës në mes të fushës, e cila mbante mbi 15 mijë vetë. Ai shpjegoi se një faqe e stadiumit ishte jashtë funksionit, ndërsa pjesa e VIP-ve ishte në cepa, duke bërë që disa zona të duken bosh.
“Ju që dëshironi ta quani dështim, është e drejta juaj, por ata që ishin aty e dinë saktësisht situatën e Alpha III. Kishte probleme për shkak të shiut që shkatërroi ekranet, por ky ishte i vetmi gabim. Mund të organizoj një tjetër Alpha Show edhe në gusht, për të parë se si do të jetë,” përfundoi Noizy.