Një defekt i përhapur në sistemet e Microsoft ka shkaktuar probleme të mëdha në nivel global, duke bërë që miliona përdorues të mos kenë akses në shërbime të rëndësishme si Outlook dhe Teams për më shumë se 12 orë.
Ndërprerja ka prekur një numër të madh biznesesh dhe institucionesh, përfshirë banka, administrata shtetërore dhe gjykata në vende të ndryshme të botës.
Të dhënat e platformës Downdetector tregojnë se ankesat për mosfunksionimin e shërbimeve u regjistruan në 74 shtete dhe territore brenda një ore. Në SHBA, situata detyroi punonjës të disa kompanive të përfundonin orarin e punës më herët, pasi nuk mund të përdornin sistemet e nevojshme për aktivitetin e tyre.
Probleme u raportuan edhe në Hong Kong, ku punonjës të institucioneve financiare si Morgan Stanley dhe Goldman Sachs i thanë CNN se ndërprerja kishte ndikuar drejtpërdrejt në punën e tyre.
Nga ana e saj, Microsoft ka vijuar përpjekjet për rikthimin e shërbimeve, por pa arritur ende një zgjidhje të plotë. Fillimisht, kompania raportoi përmirësime pas ndërhyrjeve teknike, por më vonë pranoi se rikthimi i sistemeve nuk ishte ende i qëndrueshëm.
Kompania ka sqaruar gjithashtu se problemi nuk lidhet me ndonjë sulm kibernetik apo cenim të sigurisë. Megjithatë, ndërprerja vijon të shkaktojë vështirësi për përdoruesit dhe organizatat që mbështeten në shërbimet e Microsoft në mbarë botën