Céline Dion do të ketë kukullën e saj Barbie! Këngëtarja e njohur kanadeze nderohet nga Mattel me një edicion të veçantë të linjës “Barbie Signature”, frymëzuar nga një prej paraqitjeve më të paharrueshme të karrierës së saj.
Kukulla është tashmë në shitje ekskluzivisht në platformën Mattel Creations, me një çmim prej 60 dollarësh. Ajo rikrijon pamjen e Dion gjatë ceremonisë së ndarjes së çmimeve Oscar në vitin 1998, ku artistja interpretoi këngën “My Heart Will Go On”, kolonën zanore të filmit ikonik “Titanic”, e cila atë mbrëmje u shpall fituese e çmimit për këngën më të mirë origjinale.
Ashtu si këngëtarja në atë ceremoni, edhe kukulla vjen e veshur me një fustan të gjatë blu të errët, me mëngë të gjata, të kombinuar me një gjerdan të frymëzuar nga diamanti në formë zemre, i njohur si “Heart of the Ocean”, që u bë simbol i filmit “Titanic”.
“Është një nder i vërtetë të bëhem pjesë e trashëgimisë së Barbie-t, përmes një kukulle të frymëzuar nga një prej momenteve më domethënëse të karrierës sime”, u shpreh Céline Dion. Ajo shtoi se shpreson që kjo kukull të frymëzojë njerëzit të shprehin veten me besim, të ndjekin ëndrrat dhe të besojnë te fuqia e zërit të tyre.
