Jennifer Na’amoana dhe bashkëshorti i saj, Jortham, mendonin se familja e tyre ishte plotësuar pas lindjes së katër fëmijëve të parë. Por jeta u rezervoi një surprizë të jashtëzakonshme: ata u bënë prindër edhe të katër vajzave të tjera.
Shtatzënia e paplanifikuar rezultoi në lindjen e katërnjakëve identike, të cilat vijnë nga e njëjta vezë e fekonduar dhe kanë material gjenetik identik. Nga pikëpamja biologjike, ato janë praktikisht kopje gjenetike të njëra-tjetrës.
Një konceptim i tillë natyral ndodh vetëm një herë në 15 milionë shtatzëni, tha doktoresha Alexa Bendall, e cila ndoqi 34-vjeçaren në Spitalin Mbretëror të Grave në Brisbane, në shtetin australian të Queensland.
“Nuk besojmë se një rast i tillë ka ndodhur më parë në Australi”, deklaroi mjekja, sipas agjencisë Associated Press.
Edhe lindja natyrale e katër fëmijëve jo identikë është jashtëzakonisht e rrallë, pasi ndodh mesatarisht në një shtatzëni nga 700 mijë.
Shtatzënitë me shumë fetuse shoqërohen me rrezik më të lartë për abort spontan, anomali të lindura dhe komplikacione të tjera. Për këtë arsye, Na’amoana u shtrua në spital për monitorim që në javën e 25-të të shtatzënisë.
Ajo solli në jetë katër vajzat me operacion cezarian më 14 korrik.
“Fakti që kemi katër foshnja të bukura dhe të shëndetshme, të lindura në javën e 28-të e katër ditë të shtatzënisë, është vërtet i jashtëzakonshëm”, u shpreh doktoresha Bendall.
Katër vajzat janë pagëzuar me emrat Emily, Harriet, Katherine dhe Alexa, ndërsa emri i fundit u vendos në nder të mjekes që ndoqi shtatzëninë.
Foshnjat janë në gjendje të mirë shëndetësore, por vijojnë të qëndrojnë në inkubator në repartin e kujdesit intensiv neonatal të spitalit.