Kryeministri Edi Rama ka promovuar sot në 5 mars librin e tij më të ri “Në sofrën e hënës”.
Rama u shpreh se për të shkruar këtë libër, ka marrë shtysë nga disa miq myslimanë. Kreu i qeverisë nënvizoi se sofra e iftarit është një vend, që shkon përtej atyre që agjërojnë.
Ai tha se bisedat që ka kryer në sofrat e iftarit, në cilësinë e kryeministrit, i ka përmbledhur në këtë libër. Rama vuri në dukje se fetë shërbejnë për të lidhur njerëzit dhe kulturat, duke shtuar se besimi islam ka luajtur rol të rëndësishëm në promovimin e paqes në shoqërinë tonë.
“Libri është një përmbledhje e mbrëmjeve të iftarit, që kam pasur kënaqësinë dhe privilegjin t’i organizoj, në funksionin që kam, duke çelur një traditë, sa i përket funksionit tim, që shkon përtej atyre që agjërojnë. Sofra e Iftarit është përtej agjëruesve. Ka qenë shtysa e disa miqve myslimanë që asgjërojnë, që të përmblidhja këto fjalë në këtë libër. Unë doja që prezantimin ta bënim në mënyrë modeste. Sofra e Iftarit na bën bashkë përtej vijave që na ndajnë në bulevard.
Ka qenë shtysa e miqve myslimanë, që më ka nxitur që të hyj më thellë në kulturën e islamit. Ka një thesar kulturash që vijnë tek ne nga feja, që duhet të kenë adhurimin tonë. Nga detyra kam njohur profesorë të nderuar të fesë islame. Parathënien e ka shkruar ministri i Jashtëm i Emirateve të Bashkuara Arabe”, tha Rama.
Gjithashtu, Rama u shpreh se iftari është ushtrim social tepër i nevojshëm për botën sot. “Iftari është ushtrim social tepër i nevojshëm për botën sot. Në iftar nuk je i prirur që të shijosh ushqimin, por që të hash bashkë me të tjerët, të mund të shkëmbesh muhabete. Unë besoj se sofra e iftarit është edhe për ateistët. Nëse ata nuk besojnë tek Allahu, mbase Allahu beson tek ato”, deklaroi kryeministri.
Në promovimin e librit të kreut të qeverisë ishin të pranishëm figura të rëndësishme nga feja islame, autorë dhe pedagogë të njohur.
Kjo nuk është hera e parë që kreu i ekzekutivit shkruan një libër, por me ndryshimin se në atë kohë, nuk ishte kryeministër. Rama shkroi librin “Kurban” në vitin 2011, kur humbi zgjedhjet për Bashkinë e Tiranës, me një diferencë tepër të ngushtë votash me Lulzim Bashën.