Gjatë vitit 2025, numri total i kartave bankare u rrit nga 1.54 milionë në tremujorin e parë, në 1.65 milionë në fund të vitit. Pra, mbi 108 mijë karta të reja në qarkullim brenda një viti, një rritje rreth 7 për qind.
Janë këto shifrat e bëra publike nga Banka e Shqipërisë, sipas së cilës, peshën kryesore e zënë kartat e debitit, që arritën në 1.45 milionë, duke treguar se përdorimi i kartës për pagesa të përditshme po zëvendëson gradualisht paranë fizike. Kartat e kreditit, ndërkohë, mbeten në nivele më modeste, rreth 119 mijë, çka tregon se tregu shqiptar vijon të jetë konservator ndaj kreditimit përmes kartës.
Gjatë vitit 2025 janë kryer mbi 39.6 milionë pagesa me kartë, me një vlerë totale prej rreth 248 miliardë lekësh. Vetëm në tremujorin e katërt janë realizuar mbi 11 milionë transaksione, duke treguar përshpejtim të qartë të përdorimit.
Dominon karta e debitit, që përbën mbi 34 milionë transaksione në vit, ndërsa kartat e kreditit afro 4.7 milionë.
Referuar të dhënave, rritja e kartave shoqërohet me zgjerim të terminaleve POS dhe kanaleve elektronike, duke e bërë më të lehtë pagesën me kartë në biznese.
Në thelb, kemi dy zhvillime që ecin paralel: më shumë karta në duart e qytetarëve dhe më shumë pika pranimi në ekonomi. Kjo do të thotë më pak cash, më shumë gjurmueshmëri dhe formalizim më i lartë i transaksioneve. Nëse trendi vijon me këto ritme, 2025 mund të konsiderohet një nga vitet kyçe në tranzicionin e Shqipërisë drejt një ekonomie gjithnjë e më digjitale.