Modelja shqiptare Françeska Murati ka surprizuar ndjekësit e saj gjatë një sesioni virtual në Instagram, ku vendosi të ndajë një anë shumë personale të jetës së saj që nuk e kishte bërë publike më parë. Përmes rubrikës “Ask Me”, ajo zbuloi për herë të parë përkushtimin e saj fetar dhe praktikën e rregullt të faljes së pesë vakteve.
Në përgjigje të pyetjeve të fansave, Françeska tregoi se feja zë një vend të rëndësishëm në jetën e saj të përditshme, duke e cilësuar si një zgjedhje personale dhe shpirtërore që e ndihmon të ruajë qetësinë dhe balancën.
Një nga temat që ngjalli më shumë interes ishte qëndrimi i saj ndaj femrave që zgjedhin të mbulohen. Modelja theksoi se mbështet plotësisht lirinë individuale dhe të drejtën e çdo gruaje për të ndjekur bindjet e saj.
“Çdo femër është e lirë të bëjë çfarë i do zemra. Secila ka rrugën dhe bindjet e veta. Unë, për shembull, falem 5 vakte dhe pse nuk do e zgjidhja si gjë për veten time, mbështes çdo grua në zgjedhjet e saj,” u shpreh ajo.
Me këtë deklaratë, Françeska përcolli një mesazh tolerance dhe respekti ndaj diversitetit të zgjedhjeve personale, duke theksuar rëndësinë e mirëkuptimit dhe pranimit në shoqëri.