Alba Pollozhani, një nga banoret më të diskutuara të edicionit të katërt të Big Brother VIP Kosova, ka vendosur të largohet nga shtëpia më e famshme në Kosovë. Lajmi u konfirmua përmes një njoftimi zyrtar në faqen e formatit në Facebook, duke surprizuar ndjekësit e spektaklit.
Vendimi i Albës vjen pas një Prime të tensionuar, ku ajo u përfshi në një debat të ashpër me Labinotin. Gjatë diskutimit, situata eskaloi ndjeshëm, ndërsa Alba shprehu pakënaqësitë e saj ndaj produksionit, duke deklaruar se materialet video ishin montuar për ta paraqitur në një dritë negative dhe se publiku nuk kishte parë të gjithë të vërtetën e debatit.
Prezantuesja Jonida Vokshi iu drejtua drejtpërdrejt Albës, duke i thënë se nëse mendonte kështu, dera ishte e hapur dhe mund të largohej nga shtëpia. Fillimisht Alba u tërhoq në dhomën e gjumit, duke lënë të paqartë vendimin e saj, por pas disa çastesh reflektimi, ajo vendosi ta ndërpresë rrugëtimin e saj në BBVK.
Largimi i Albës pritet të sjellë reagime të shumta nga publiku dhe banorët e tjerë, duke qenë se ajo ishte një nga figurat më të zëshme dhe të komentuar të këtij sezoni.