Departamenti i Shtetit i Shteteve të Bashkuara ka njoftuar se, duke filluar nga data 21 janar 2026, do të pezullojë lëshimin e të gjitha vizave emigruese për aplikantët që janë shtetas të 75 shteteve, përfshirë Shqipërinë. Ky vendim vjen si pjesë e politikave të administratës për të garantuar që emigrantët të jenë financiarisht të vetë-mjaftueshëm dhe të mos përbëjnë një barrë për amerikanët.
Në lidhje me këtë lajm të publikuar një ditë më parë, në 14 janar, ka reaguar edhe Ambasada Amerikane në Tiranë, e cila ka dhënë më tepër detaje.
“Duke filluar nga 21 janari 2026, Departamenti i Shtetit do të pezullojë lëshimin e të gjitha vizave emigruese për aplikantët që janë shtetas të vendeve të listuara. Kjo përfshin edhe Shqipërinë. Nuk ka asnjë ndryshim në vizat turistike apo jo-emigruese, të cilat vazhdojnë të lëshohen normalisht”.
Ambasada shprehet se Presidenti Trump ka theksuar rëndësinë e vetë-mjaftueshmërisë financiare të emigrantëve, duke nënvizuar se emigrantët duhet të jenë financiarisht të vetë-mjaftueshëm dhe të mos përbëjnë barrë financiare për amerikanët. Ambasada Amerikane sqaron se pezullimi i vizave ka për qëllim të rishikojë politikat dhe rregulloret që lidhen me përdorimin e përfitimeve nga emigrantët dhe të sigurojë që aplikantët nga vendet me rrezik të lartë të mos konsiderohen barrë për qeverinë
Në listën e shteteve të prekura përfshihen, ndër të tjera: Afganistani, Shqipëria, Algjeria, Armenia, Azerbajxhani, Bangladeshi, Bjellorusia, Bosnje e Hercegovina, Brazili, Irani, Iraku, Kosova, Mali i Zi, Maqedonia e Veriut, Rusia, Siria dhe Jemeni. Lista e plotë përfshin gjithsej 85 vende nga të gjitha kontinentet.
Ambasada dhe Departamenti i Shtetit kanë dhënë sqarime të qarta për aplikantët. “Aplikantët për vizë emigruese që janë shtetas të vendeve të prekura mund të dorëzojnë aplikimet dhe të marrin pjesë në intervista, por asnjë vizë nuk do të lëshohet gjatë kësaj periudhe pezullimi. Shtetasit me dy shtetësi që aplikojnë me pasaportë të një vendi që nuk është në listë përjashtohen nga ky pezullim”, thuhet në reagim.
Sa i përket vizave aktuale, Ambasada njofton se asnjë vizë e emigracionit e lëshuar më pare, nuk është hequr. “Asnjë vizë emigrimi e lëshuar më parë nuk është hequr. Për pyetje që lidhen me hyrjen në SHBA, ju mund të kontaktoni Departamentin e Sigurisë Kombëtare të Shteteve të Bashkuara”.
Për qytetarët që planifikojnë të udhëtojnë në Shtetet e Bashkuara me vizë vizitori B1/B2, Ambasada rikujton se këto viza lejohen për: turizëm, pushime, vizita tek të afërmit, takime biznesi ose pjesëmarrje në konventa dhe konferenca. Ndërkohë, aktivitetet që nuk lejohen me vizë B1/B2 përfshijnë: punë të paguar në SHBA, studime për diplomë akademike, turizëm lindjeje dhe performanca të paguara.
Ambasada dhe Departamenti i Shtetit sugjerojnë që qytetarët të planifikojnë udhëtimet me kujdes dhe të qëndrojnë të informuar për çdo ndryshim të politikave të vizave, duke monitoruar njoftimet zyrtare përditësuese. “Qytetarët duhet të përdorin vizat e tyre në mënyrë korrekte dhe të respektojnë kufizimet e përcaktuara”, thekson Ambasada Amerikane.
Pas lajmit për pezullimin e vizave amerikane për emigracionin ndaj Shqipërisë,ka reaguar sot në 15 janar edhe ministrja e Jashtme e vendit , Elisa Spiropali. Ministrja, përmes një postimi në rrjete sociale, e ka cilësuar pezullimin e vizave për Shqipërinë si “fabul” e “trillim politik”. Ajo thekson se vendimi i Shteteve të Bashkuara nuk ka bllokuar lëvizjen e udhëtimin e qytetarëve shqiptarë, sidomos ato për qëllime turistike, studentët, biznesi, vizita te familjarët apo evente të lidhura me punën.
Departamenti Amerikan i Shtetit ka njoftuar se do të pezullojë shqyrtimin e aplikimeve për vizat e emigrantëve për shtetasit e 75 vendeve, duke përfshirë Shqipërinë, Kosovën, Malin e Zi dhe Bosnje Hercegovinën. Nga vendet e Ballkanit Perëndimor, përjashtim bën vetëm Serbia, e cila nuk ndikohet nga kjo masë. Shtëpia e Bardhë sqaroi se pezullimi do të nisë në 21 janar dhe do të qëndrojë në fuqi deri sa SHBA të ketë siguri që emigrantët nga këto vende nuk do të konsiderohen barrë financiare për shtetin ose taksapaguesit amerikanë. Vendimi është pjesë e politikave të administratës Trump për të rishikuar rregulloret e emigracionit dhe përdorimin e ndihmave publike.