Një studim i ri ka ngritur shqetësime serioze mbi sigurinë e ndërhyrjeve estetike, veçanërisht atyre me mbushës në fytyrë, pasi disa procedura mund të çojnë në komplikacione të rënda si bllokimi i enëve të gjakut, dëmtime të lëkurës dhe në raste ekstreme, humbje të përhershme të shikimit.
Të dhënat tregojnë se në një përqindje të konsiderueshme të rasteve, injektimet estetike shkaktojnë reduktim të qarkullimit të gjakut në enët perforatore të fytyrës. Në shumicën e rasteve të studiuara, bllokimet kanë prekur enë kryesore, çka rrit ndjeshëm rrezikun e komplikacioneve të rënda.
Kur mbushësit si acidi hialuronik apo yndyra autologe futen gabimisht në një enë të gjakut, materiali mund të migrojë drejt arterieve që furnizojnë syrin ose zona të ndjeshme të fytyrës. Kjo mund të shkaktojë mbyllje të arterieve të retinës ose të arterieve okulare, që shpesh rezulton në humbje të menjëhershme dhe të pakthyeshme të shikimit. Në raste të rralla, është raportuar edhe rrezik për dëmtime cerebrale.
Ekspertët theksojnë se fytyra ka një rrjet kompleks enësh gjaku, dhe disa zona si hunda, balli dhe pjesa rreth syve janë veçanërisht të rrezikshme. Procedurat e kryera nga persona pa trajnim të duhur rrisin shumë mundësinë e komplikacioneve të rënda.
Mjekët rekomandojnë që pacientët të informohen plotësisht për rreziqet para çdo procedure estetike. Për më tepër, përdorimi i ultratingullit gjatë injektimit po sugjerohet si një mënyrë për të lokalizuar enët e gjakut dhe për të minimizuar rrezikun e dëmtimeve.
Studimi thekson se, pavarësisht popullaritetit të lartë të ndërhyrjeve estetike, ato nuk duhet të konsiderohen të padëmshme. Komplikacionet, sidomos ato që prekin shikimin, janë të rralla, por mund të jenë të pakthyeshme, duke e bërë të domosdoshme kryerjen e procedurave vetëm nga profesionistë të kualifikuar.