Nëse jeni ndër ata që fillojnë ditën me një pije energjike për të “marrë vrull” para stërvitjes, ndoshta është koha të rimendoni këtë zakon. Studime të reja paralajmërojnë se konsumimi i përditshëm i pijeve energjike mund të ndikojë ndjeshëm në procesin e ndërtimit të muskujve madje ta pengojë deri në 90%.
Si ndikon pija energjike në trup
Pijet energjike përmbajnë sasi të larta kafeine, sheqeri dhe përbërës stimulues si taurina apo guarana. Këto substanca rrisin përkohësisht nivelin e energjisë dhe përqendrimit, por në të njëjtën kohë nxisin prodhimin e hormonit të stresit, kortizolit.
Kortizoli, ndonëse i nevojshëm në doza të vogla, është hormon katabolik që do të thotë se ndihmon në prishjen e indeve, përfshirë edhe ato muskulore. Kur niveli i tij mbetet i lartë për periudha të gjata, sinteza e proteinave në trup ngadalësohet dhe muskujt e kanë më të vështirë të rriten apo të rikuperohen pas stërvitjes.
Efekti në gjumë dhe rikuperim
Një tjetër faktor i rëndësishëm është gjumi. Kafeina që përmbajnë pijet energjike mund të qëndrojë aktive në organizëm deri në 8 orë, duke prishur cilësinë e gjumit edhe nëse nuk e ndjeni menjëherë.
Mungesa e gjumit të thellë ul prodhimin e hormonit të rritjes një element kyç për ndërtimin dhe rigjenerimin e fibrave muskulore.
Kombinimi i këtyre faktorëve kortizol i lartë, gjumë i dobët dhe sheqer i tepërt e bën shumë më të vështirë arritjen e rezultateve në palestër, pavarësisht stërvitjeve intensive.
Çfarë mund të bëni
Ekspertët e fitnesit dhe nutricionit sugjerojnë që përpara stërvitjes të zgjidhen alternativa më natyrale për energji:
- Një filxhan kafe e zezë, në sasi të moderuar.
- Një banane ose një vakt i lehtë me karbohidrate komplekse.
- Hidratim i mirë gjatë gjithë ditës.
Pas stërvitjes, fokusi duhet të jetë tek rikuperimi: proteina e mjaftueshme, gjumë cilësor dhe shmangie e çdo stimuluesi që prish ritmin natyral të trupit.