Në intervistën e saj më të fundit, Era Istrefi ka folur me sinqeritet për një temë që shpesh mbetet tabu në industrinë muzikore — ngacmimet seksuale në ambientet e punës. Por ndryshe nga shumë tregime që kanë dalë nga artistë të tjerë, Era tregon se përvoja e saj ka qenë plotësisht pozitive.
“Nuk kam asnjëherë probleme me diskriminime nëpër studio, ose me ngacmime seksuale. Jam respektu gjithkund,” tha artistja, duke theksuar se është ndjerë e vlerësuar dhe e mbrojtur në çdo bashkëpunim që ka pasur ndër vite.
Ajo shtoi se gjithçka lidhet me mënyrën se si njeriu e vendos veten dhe energjinë që përcjell: “Nga eksperienca jem, njerëzit kanë qenë të respektueshëm. Unë e rrezatoj një energji, jo bash lehtë me lujt dikush. Edhe e kam marrë prapa atë që e kam reflektu.”
Megjithatë, Istrefi pranon se sfidat më të mëdha nuk vijnë nga ambientet profesionale, por nga hapësira online. “Nëse ka raste të tilla, merren masa, por nuk ka pas. Po nëse flasim online, është pak më ndryshe, se njerëzit po fshihen pas llogarive fallse. Liria e fjalës është më e madhe, por mundohem mos me adaptu perspektivën e atyre njerëzve,” u shpreh ajo.
Me këtë deklaratë, Era tregon se suksesi dhe dinjiteti mund të bashkëjetojnë në një industri të ashpër, për sa kohë një artist qëndron i fortë në vlerat e veta.