E ftuar në “Live From Tirana” me Ronaldo Sharkën, ka qenë psikologia Besarta Taçi. Ajo ka folur më shumë mbi manipulimin emocional dhe si t’i dallojmë këta persona manipulues. Çfarë të bëjmë nëse kemi në jetën tonë një manipulues emocional?
Si veprojnë manipulatorët me partneret e tyre, a kërkojnë që t’i rrisin në karrierë apo më tej?
Mund të jetë një fazë e parë kjo, sepse nëpërmjet këtij mekanizmi krijohet varësia. Pra, viktima do të jetë gjithmonë falënderuese sepse mendon se e ka bërë për të. Në realitet manipulatori e ka bërë që të ndihet ai më i aftë, më i zoti. E bëjnë këtë në fazat fillestare.
Shpesh manipulatori mundohet të ketë shoqe dhe shoqet e viktimës. Çfarë ndodh në këtë moment? Nëse viktima shkon tek shoqet dhe thotë se si ka ndodhur një situatë, ato i dalin në mbrojtje atij. Pse? Sepse në këtë formë ata e kanë të nevojshme të blejnë dhe njerëzit përreth. Nuk po flasim për personazhe filmash apo librash, ne po flasim për një realitet shqiptar, janë persona nga bota mediatike por jo vetëm, persona që kanë një influencë.
Deri ku shkon dëshira për të denigruar partneren?
Nëse ne kemi një bërthamë malinje, e cila është i njëjti mekanizëm për kriminalët… Në botën kriminale ekziston një mekanizëm që jo të gjithë ata që bëjnë krime e kanë këtë, por ekziston një tipologji e personave me anti-socialitet, pra si patologji, ku sa më shumë viktima të ndihet keq, aq më shumë rritet niveli i intensitetit emocional i mirëqenies së manipulatorit. Këtu pastaj flasim për patologji të mirëfillta. Çështja është që ndërkohë që ti ke humbur kohë për të identifikuar trajtat e manipulatorit, ti ke humbur veten tënde. Kështu që nëse identifikoni që në hapat e parë këto lloj mekanizmash, ikni!