Vitet ’90 po rikthehen fuqishëm në modë dhe këtë herë në fokus janë vetullat e holla, një trend që shumë prej nesh mendonin se do të mbetej përgjithmonë në të kaluarën. Pas veshjeve dhe grimit të asaj kohe, estetika e viteve ’90 po merr gjithnjë e më shumë vëmendje në TikTok dhe Instagram, veçanërisht nga Gen Z.
Por ka një ndryshim: vetullat e holla të këtij trendi nuk janë aq të ekzagjeruara sa dikur. Forma e re është më e butë dhe më natyrale, duke ruajtur një pamje të kuruar pa e holluar tepër vetullën.
Mes emrave që po e rikthejnë këtë stil janë Bella Hadid, Iris Law, Lila Moss dhe Gabriette. Megjithatë, duke qenë se forma e vetullave është e vështirë për t’u ndryshuar vazhdimisht, tendenca është që secila të përshtatë trendin me vetullat e saj natyrale.