Një studim i ri shkencor ka zbuluar se cilësia e spermës tek meshkujt arrin nivelin më të lartë gjatë muajve të verës dhe bie ndjeshëm në dimër.
Hulumtimi u realizua nga studiues në Mbretërinë e Bashkuar, Kanada dhe Danimarkë, përfshirë ekspertë nga University of Manchester. Ata analizuan 15 mijë e 581 mostra të spermës nga burra të moshës 18 deri në 45 vjeç në Danimarkë dhe në Florida.
Sipas të dhënave, lëvizshmëria e spermatozoidëve, aftësia e tyre për të notuar në mënyrë efektive ishte më e larta në muajt qershor dhe korrik, në të dyja vendet e studimit. Nivelet më të ulëta u regjistruan në dhjetor dhe janar.
Interesant është fakti se edhe në Florida, ku temperaturat mbeten të larta gjatë gjithë vitit, u vu re i njëjti model sezonal.
Studimi është publikuar në revistën shkencore Reproductive Biology and Endocrinology dhe sugjeron se ndryshimet sezonale ndikojnë në lëvizshmërinë e spermës, pavarësisht klimës.
Shkencëtarët nuk gjetën ndryshime në përqendrimin total të spermës apo në vëllimin e ejakulatit gjatë stinëve të ndryshme. Kjo do të thotë se numri i spermatozoidëve të prodhuar mbetet i njëjtë, ndërsa ndryshon vetëm aftësia e tyre për të lëvizur.
Sipas autorëve, këto gjetje mund të ndihmojnë në përmirësimin e trajtimeve të fertilitetit, duke përshtatur kohën e testimeve dhe ndërhyrjeve për çiftet që përpiqen të kenë fëmijë.
Profesori Allan Pacey nga University of Manchester, bashkautor i studimit, theksoi se studiuesit u habitën nga ngjashmëria e rezultateve në dy klima të ndryshme.
“Edhe në Florida, ku temperaturat janë të larta gjatë gjithë vitit, lëvizshmëria e spermës arrin kulmin në verë dhe bie në dimër. Kjo tregon se vetëm temperatura e ambientit nuk e shpjegon këtë fenomen”, tha ai.
Studiuesit theksojnë se temperatura optimale e testikujve duhet të jetë 2–4 gradë Celsius më e ulët se temperatura normale e trupit (37°C). Çdo devijim nga ky interval mund të ndikojë negativisht në fertilitet.
Gjetjet e reja thellojnë kuptimin mbi shëndetin riprodhues mashkullor dhe mund të kontribuojnë në rritjen e suksesit të trajtimeve të fertilitetit në të ardhmen.