Një studim i ri shkencor ka hapur një dritë shprese në luftën kundër kancerit, duke sugjeruar se trajtimi mund të vijë pikërisht nga macet. Studiues nga universitete të njohura në SHBA kanë testuar një terapi inovative tek macet me kancer oral, me rezultate premtuese që mund të aplikohen edhe te njerëzit.
Bëhet fjalë për një trajtim të ri të bazuar në ADN, i quajtur “STAT3 decoy”, i cili synon një proteinë që aktivizohet në rreth 75% të tumoreve njerëzore. Kjo proteinë ka qenë shumë e vështirë për t’u bllokuar me metodat tradicionale, por teknologjia e re arrin të pengojë gjenet që nxisin rritjen e kancerit.
Në një provë ku morën pjesë 20 mace me kancer, terapia u aplikua me injeksione për një muaj. Rezultatet treguan se rreth 35% e tyre patën tkurrje të tumorit ose stabilizim të sëmundjes, ndërsa efektet anësore ishin minimale. Madje një nga macet jetoi mbi tetë muaj pas diagnozës, shumë më gjatë se sa pritej.
Shkencëtarët besojnë se ky trajtim jo vetëm që ndikon drejtpërdrejt te tumoret, por edhe forcon reagimin e sistemit imunitar. Suksesi i tij tek macet dhe testet paraprake tek minjtë tregojnë potencial real që kjo metodë të përdoret edhe për trajtimin e kancerit tek njerëzit në të ardhmen.
Ekspertët po kërkojnë tashmë financime për prova klinike tek njerëzit, ndërsa studimet tek macet do të vazhdojnë për të përmirësuar edhe më shumë terapinë. Nëse rezultatet konfirmohen, kjo mund të shënojë një hap të madh drejt trajtimeve më të sakta dhe më pak agresive kundër kancerit.