Bashkimi Evropian i ka kërkuar TikTok që të ndryshojë atë që e quan “dizajn varësie”, përndryshe platforma rrezikon gjoba të mëdha financiare. Vendimi vjen pas një hetimi të nisur në shkurt 2024 nga Komisioni Evropian.
Sipas gjetjeve paraprake, TikTok nuk ka vlerësuar siç duhet ndikimin e funksioneve si autoplay dhe scroll-i pafund në mirëqenien e përdoruesve, veçanërisht të fëmijëve dhe të rinjve.
Komisioni ka sugjeruar masa si pushime nga ekrani gjatë natës, ndryshime në algoritmet e përmbajtjes dhe çaktivizimin e scroll-it pafund. Nëse shkeljet konfirmohen, TikTok mund të gjobitet deri në 6% të xhiros së saj globale vjetore.
TikTok i ka quajtur gjetjet “të pabazuara” dhe ka deklaruar se do t’i kundërshtojë ato. Ndërkohë, ekspertët e shohin këtë si një sinjal paralajmërues për të gjitha platformat sociale, duke theksuar se mirëqenia e përdoruesve po vendoset gjithnjë e më shumë mbi fitimin.