Për herë të parë pas 14 vitesh, Apple pritet të kalojë Samsung-un në dërgesat globale të celularëve gjatë vitit 2025 një moment historik që mund të ndryshojë ekuilibrat e tregut të smartfonëve.
Raportet tregojnë se Apple pritet të dërgojë rreth 243 milionë iPhone, duke lënë pas Samsung-un me 235 milionë njësi. Me këto shifra, Apple mund të arrijë 19.4% të tregut global, ndërsa Samsung bie në 18.7%.
Edhe pse dërgesat nuk janë e njëjta gjë me shitjet direkte tek konsumatorët, ato janë tregues të qartë të kërkesës dhe pritshmërive të kompanive. Dhe duket se kërkesa për Apple është më e larta në më shumë se një dekadë.
Cili është sekreti i Apple këtë vit?
Suksesi lidhet ngushtë me daljen e iPhone 17, i prezantuar në shtator, i cili ka thyer pritshmëritë e tregut. Në SHBA, shitjet e modelit të ri përfshirë iPhone Air ishin 12% më të larta në katër javët e para krahasuar me iPhone 16. Ndërsa në Kinë, një prej tregjeve më vendimtare për Apple, rritja ishte edhe më e fortë: 18% më shumë shitje.
Një tjetër faktor kyç është cikli i zëvendësimit të celularëve: përdoruesit që blenë pajisje gjatë periudhës së pandemisë, tani po kalojnë masivisht në modele më të reja.
Ndërkohë, çfarë po ndodh me Samsung?
Samsung po përballet me presion të madh nga kompanitë kineze si Xiaomi, Oppo dhe Vivo të cilat po marrin një pjesë të konsiderueshme të tregut, sidomos në segmentin e mesëm dhe të ulët të çmimeve. Kjo e bën më të vështirë për prodhuesin korean të mbajë pozicionin e parë që ka dominuar për vite të tëra.
Nëse trendi vazhdon, 2025 mund të jetë viti ku Apple jo vetëm e kalon Samsung-un por mban pozicionin e liderit global për herë të parë në më shumë se një dekadë.