Shqipëria po shkëlqen në fushën e sigurisë kibernetike! Sipas National Cyber Security Index (NCSI) 2025, vendi ynë është renditur e 15-ta në botë, duke treguar se përpjekjet e mëdha për mbrojtjen digjitale po japin fryte.
Lajmi u bë i ditur nga Belinda Balluku, zëvendëskryeministre dhe ministre për Infrastrukturën dhe Energjinë, përmes rrjeteve sociale. Ajo thekson se Shqipëria ka përmirësuar pozicionin me 39 vende krahasuar me vitin 2023, një progres që po vlerësohet ndërkombëtarisht.
Sipas Ballukut, ky sukses është rezultat i një pune të përbashkët dhe të përkushtuar në:
- Përforcimin e kuadrit ligjor dhe institucional
- Rritjen e ndërgjegjësimit publik
- Përmirësimin e reagimit ndaj incidenteve kibernetike
- Mbrojtjen e infrastrukturave kritike dhe të dhënave personale
“Me 85 pikë të plota në NCSI, Shqipëria tregon se siguria kibernetike nuk është më thjesht një sfidë, por një prioritet kombëtar, i Qeverisë Shqiptare dhe Autoritetit Kombëtar për Sigurinë Kibernetike. Ky është një histori suksesi që konfirmon rolin gjithnjë e më të rëndësishëm të Shqipërisë në hartën digjitale globale,” shkruan Balluku.
Ekspertët e sigurisë digjitale po vlerësojnë se ky progres i vendit do të ndihmojë në tërheqjen e investimeve, forcimin e besimit tek qytetarët dhe mbrojtjen e infrastrukturave të rëndësishme nga kërcënimet kibernetike të nivelit të lartë.