Në mbledhjen e kësaj të marte Keshilli Bashkiak votoi pro shkarkimit të Erion Veliaj, si kryetar i Bashkisë së Tiranës.
Në këshill, opozite dhe mazhorancë bashkuan votat për shkarkimin e tij. Me propozim të këshilltarit Braimllari Këshilli Bashkiak mblodhi 3 kërkesat për shkarkimin e Erion Veliajt; atë të Partisë Socialiste, të Partisë Demokratike dhe të këshilltarit Endri Shabani, duke i votuar si nje e vetme.
Por jo të gjithë të zgjedhurit në këshill ishin pro këtij vendimi.
Konkretisht, këshilltarët e majtë, Joleza Koka dhe Gaz Paja, nuk ishin të pranishëm në mbledhje ndërsa Aldo Merkoci, Alfred Muharremi dhe Fabian Topollaj, nuk morën pjesë në votim edhe pse ishin të pranishëm në mbledhje e Këshillit Bashkiak.
Vendimi i Këshillit Bashkiak për shkarkimin e Erion Veliajt i dërgohet Prefektit të qarkut dhe ky i fundit ia dërgon propozimin për shkarkimin e kreut të Bashkisë së Tiranës, qeverisë shqiptare. Sipas procedurës, vendimin final do ta marrë Këshilli i Ministrave.
Prej 10 shkurtit të këtij viti, Erion Veliaj ndodhet në paraburgimin e Durrësit, i arrestuar me urdhër të SPAK. Veliaj përballet në gjykatë për 5 akuza të Prokurorisë të Posaçme.Përveç akuzave për korrupsion të kryer në disa raste, pastrim parash, fshehje pasurie dhe futjes së sendeve të jashtëligjshme në qeli Veliajit iu rënduan pozitat penale pasi akuzohet edhe për shpërdorim detyre.