Presidenti ukrainas, Volodimir Zelensky, ftoi të hënën një takim bilateral me Rusinë për të diskutuar për dhënien fund të luftës.
Afati i 1 shtatorit, sipas tij, është vendosur në bashkëpunim me aleatët dhe, nëse Kremlini nuk reagon pozitivisht, atëherë, sipas tij, duhet të ketë një reagim të fortë nga ndërkombëtarët.
Nga ana tjetër, presidenti francez Macron dhe kancelari gjerman Merz, në një konferencë të përbashkët nga Franca, dhanë mbështetjen e tyre për krijimin e sigurisë për Ukrainën.
Për Macron, nëse Putini nuk pranon të takohet me Zelenskyn, kjo do të thotë se presidenti rus është tallur me Trump-in, dhe kjo nuk mund të mbetet pa një përgjigje.
Ndërsa për kancelarin gjerman nuk ka asnjë dyshim se Putini nuk do ta takojë presidentin ukrainas.
Teksa marrëveshja e paqes në Ukrainë nuk duket në horizont, mes vendeve të BE-së po diskutohet seriozisht dërgimi i ushtarëve europianë në këtë vend, pavarësisht se rusët e kanë konsideruar këtë një vijë të kuqe, e cila, nëse kapërcehet, mund të çojë në shpërthimin e një lufte të tretë botërore.
Ministrat e Jashtëm dhe ata të Mbrojtjes të vendeve anëtare të BE-së u mblodhën këtë të premte në Kopenhagë për një takim 2-ditor informal, ku kjo çështje pritet të jetë një prej temave kryesore të diskutimit.
“Do të diskutojmë se si të ndryshojmë mandatin e të gjitha misioneve, për të qenë gati nëse një marrëveshje paqeje vihet në zbatim. Sigurisht, kontributin për garantimin e sigurisë së Ukrainës e përcakton çdo vend anëtar, por Bashkimi Europian ka si mision vetëm pjesën e trajnimit, për të shtuar fuqinë mbrojtëse të vendit.”, tha Kallas.
Ndërsa Uashingtoni miratoi shitjen e një sasie armatimi me vlerë 825 milionë dollarë për Ukrainën, që sipas marrëveshjeve, për to do të paguajnë vendet europiane.
Pjesë e paketës janë edhe mbi 3 mijë raketa ERAM me rreze goditjeje deri në 400 kilometra.