Ai shkaktoi valë tronditëse në mbarë botën kur u filmua duke gdhendur emrin e tij në një mur të Colosseum-it 2000-vjeçar të Romës – dhe duke buzëqeshur kur kuptoi se ishte kapur nga kamera. Tani, ai ka të ngjarë të jetë në shok vetë.
Vizitori që këtë javë dyshohet se gërvishti “Ivan+Hayley 23” në një mur me tulla të një prej ndërtesave më të çmuara në botë, është identifikuar, sipas ministrit të kulturës të Italisë. Ministri i Kulturës Gennaro Sangiuliano shkroi të enjten se Karabinierët, një forcë policore ushtarake, kishin “identifikuar personin që supozohej se ishte përgjegjës për aktin e pacivilizuar dhe absurd të kryer në Colosseum”. “Një akt që ofendoi të gjithë anembanë globit që vlerësojnë vlerën e arkeologjisë, të monumenteve dhe të historisë,” shtoi ai. Twitter-i i tij konfirmoi se “Ivan dhe Hayley” mendohet të jenë emrat e turistit dhe të dashurës së tij, e cila u filmua duke parë teksa ai gdhendte emrat e tyre. Në një postim të dytë në Twitter, Sangiuliano sugjeroi se çështja do të shkojë në gjyq.
“Shpresoj që drejtësia të marrë rrugën e saj, duke zbatuar ligjin me rigorozitet,” shkroi ai. “Nëse bëhet fjalë për gjykim, Ministria e Kulturës do të dalë si paditëse”. Nëse dënohet për një krim, burri mund të përballet me një gjobë prej të paktën 15,000 euro (16,360 dollarë) ose deri në pesë vjet burg, sipas agjencisë italiane të lajmeve Ansa. Dega e Karabinierëve në Piazza Venezia lëshoi një deklaratë për CNN duke konfirmuar se i dyshuari ishte gjurmuar dhe çifti besohet të jetë nga Britania e Madhe. Policia “identifikoi të dyshuarin kryesor përmes hetimeve tradicionale dhe krahasimit fotografik”, shkruan ata. “Karabinierët kanë konfirmuar se bëhet fjalë për një çift, burrë e grua, banues në Angli.
“Duhet të theksohet se procedurat janë në fazën e hetimeve paraprake, kështu që i dyshuari duhet të konsiderohet i pafajshëm deri në ndonjë vendim përfundimtar [gjykatës]”.
Burimi i artikullit: https://edition.cnn.com/travel/rome-colosseum-ivan-hayley-graffiti-identified/index.html