Një avion me 242 pasagjerë në bord, është rrëzuar në një zonë të banuar pranë aeroportit në Ahmedabad të Indisë.
Gazeta “Times of India” raporton se avioni “Boeing 787 Dreamliner” i “Air India”, me destinacion Londrën, u rrëzua menjëherë pas ngritjes nga aeroporti ndërkombëtar Sardar Vallabhbhai Patel.
Pas aksidentit, një re e dendur tymi e zezë u pa duke dalë nga zona e aeroportit, ndërsa ekipet e emergjencës janë nisur menjëherë drejt vendit të ngjarjes.
Televizioni indian CNN News-18 raportoi se avioni u rrëzua mbi zonën e ngrënies së konviktit të kolegjit shtetëror B.J. Medical College, duke shkaktuar vdekjen e shumë studentëve të mjekësisë. Në transmetim u shfaq një pamje ku një pjesë e avionit ishte ndalur mbi ndërtesë.
Punonjësit e shpëtimit thanë se janë gjetur të paktën 30 deri në 35 trupa në vendin e ngjarjes dhe se disa persona janë ende të bllokuar.
Sipas një burimi për agjencinë Reuters, në bord ndodheshin 217 të rritur, 11 fëmijë dhe 2 foshnja. Ndër ta, 169 ishin shtetas indianë, 53 britanikë, 7 portugezë dhe 1 kanadez, bëri të ditur kompania Air India.
Faqja për ndjekjen e fluturimeve Flightradar24 konfirmoi se avioni ishte një Boeing 787-8 Dreamliner, një nga aeroplanët më modernë për udhëtime pasagjerësh në shërbim aktual.