Olly, fituesi i Sanremo-s 2025, ka hequr dorë nga përfaqësimi i shtetit Italian në Eurovision.
Lajmin e ka bërë vetë të ditur këngëtari me anë të një postimi në Instagram ku është shprehur se është tërhequr nga kjo mundësi e artë.
“Kam vendosur të heq dorë nga mundësia për të marrë pjesë në Eurovision, me vetëdijen se është një nga ato gjëra që ndoshta ndodh vetëm një herë në jetë,” ka shkruar Olly.
Edhe pse nuk e ka bërë të ditur arsyen e këtij vendimi, këngëtari ka nënkuptuar se nuk e ndjen të përshtatshëm momentin për të marrë pjesë në një kompeticion kaq të madh, teksa shprehet: “Për mua, ky vendim është mënyra ime për të dëgjuar veten dhe ndoshta edhe mënyra ime e shtrembër për të thënë faleminderit. Disa do të thonë se po heq dorë nga një ëndërr, mirëpo mendoj se thjesht kam zgjedhur ta jetoj atë në kohën time.”
23-vjecari e ka mbyllur postimin e tij duke falënderuar të gjithë fansat që besuan në të, duke i uruar fat gjithashtu edhe artistit që do të zërë vendin e tij, i cili nuk është bërë ende i ditur.
