Ingrit Jushi, ylli i muzikës shqiptare, ka rrëfyer për herë të parë pasionin e saj për muzikën në një intervistë të veçantë per Faber Media. Në një bisedë të hapur, ajo theksoi se pasioni për muzikën nuk është thjesht një zgjedhje, por një trashëgimi që vjen nga familja.
“Ka lindur qëkur unë kam lindur, për shkak se e kam të trashëguar nga mamaja ime. Dardha bie nën dardhë dhe unë do këndoja,” tha ajo kur u pyet për origjinën e pasionit të saj për muzikën.
Ingriti ka jetuar nën hijen e një emri të madh në botën e muzikës shqiptare, por për të, është e rëndësishme të krijojë identitetin e vet. Ajo rrëfeu se ende nga fillimi nuk e ka treguar publikisht se është vajza e një këngëtare të njohur, duke dëshiruar të ndërtojë karrierën e saj në mënyrë të pavarur.
“Po fillimisht, sepse kanë ditur që jam vajza e një këngëtare, nuk e kam treguar që jam e bija e saj. S’doja që të më ndiqte fama e saj, doja të krijoja diçka timen,” shprehet ajo. Megjithatë, ajo pranon se mbështetja e kolegëve të nënës së saj në industrinë e muzikës ka qenë e jashtëzakonshme dhe e dobishme për rrugëtimin e saj.
Përveç pasionit për muzikën, Ingriti është edhe juriste, duke parë veten në të ardhmen duke ecur edhe në këtë drejtim të karrierës. “Unë kam edhe një zanat tjetër, jam juriste. E shikoj veten edhe tek profesioni që e trashëgoj nga babai,” tha ajo.
Nëse është ëndrra e saj më e madhe për t’u realizuar, ajo shprehet me bindje: “Njeriu jeton ose për aq sa jeton ka edhe ëndrra, kështu që ëndrra ime e fundit nuk është realizuar, patjetër që jo, do realizohet në të ardhmen.”
Për të ardhmen e saj në botën e muzikës, Ingriti është shprehur shpresëplotë: “Shpresoj që do të më shikoni më të angazhuar në muzikë në të ardhmen.”
Ingrit Jushi, një artiste me talente të shumta, i ka kushtuar jetën muzikës dhe profesionalizmit, ndërsa po ndjek pasionin e saj në mënyrën më autentike dhe të pavarur të mundshme.