Regjimi ushqimor mesdhetar është mjaft i shëndetshëm për organizmin dhe studime të tjera e vërtetojnë dhe zbulojnë benefite të tjera. Madje i shoqëruar me ushtrim fizik, qofte edhe të lehtë, ul deri në 31% rrezikun dhe probabilitetin e prekjes nga diabeti tek personat më të prirur për ta patur më tej në jetë. Dhe jo vetëm, por redukton ndjeshëm edhe mundësinë e prekjes së shëndetit mendor me patologji të lidhura me demencën apo të tjera.
Një studim i Universitetit Harvard, në bashkëpunim me 23 spitale spanjolle kanë vëzhguar për gjashtë vjet mijëra pacientë me të ashtuquajturën sindromë metabolike, pra që kanë faktorë risku për t’u prekur nga diabeti, si pasojë e hipertensionit, sasi të larta të kolesterolit dhe sheqernave në gjak, apo mbipeshë abdominale.
Regjimi ushqimor mesdhetar, kryesisht me pak mish, i pasur me fruta e perime, peshk, bishtaja e fruta të thata, i shoqëruar edhe me lëvizje e aktivitet fizik normal, sjell benefite jo vetëm për peshën, por për të gjithë organizmin, shëndetin dhe parandalimin e prekjes nga patologji të ndryshme.
Studimet janë publikuar në revistat shkencore ndërkombëtare , ndër të cilat edhe Nature Medicine.