Sot, Kombëtarja Shqiptare do të zbresë në fushë për testin e fundit para Kampionatit Europian 2024, duke luajtur ndaj Azerbajxhanit në orën 19:00.
Kundërshtari i sotëm, Azerbajxhani, është më i fortë se Lihtenshtejni, me të cilin Shqipëria luajti pak ditë më parë. Kuqezinjtë e drejtuar nga Silvinjo synojnë të marrin një rezultat pozitiv për të ngritur moralin para ndeshjes së vështirë kundër Italisë.
Në konferencën për shtyp, trajneri Silvinjo konfirmoi se Jasir Asani do të jetë titullar nga minuta e parë. Pas kësaj miqësoreje, stafi teknik do të bëjë vlerësimet e nevojshme për të vendosur formacionin që do të përballet me Italinë më 15 qershor.
FORMACIONI – Etrit Berisha pritet të jetë në portë, duke shpresuar që eksperienca e tij do të jetë e vlefshme edhe në Kampionatin Europian. Berat Gjimshiti do të jetë kapiteni dhe do të luajë nga fillimi, duke u bashkuar me Ardian Ismajlin në mbrojtje. Në krahun e djathtë, trajneri ka dilemë mes Balliut dhe Hysajt. Pas gabimeve në miqësoren me Kilin, Balliu ka filluar si titullar në ndeshjet e fundit dhe mund të jetë sërish zgjedhja e parë. Në krahun e majtë, Mario Mitaj pritet të jetë titullar.
Në mesfushë do të luajnë Ylber Ramadani, Kristjan Asllani dhe Nedim Bajrami. Në repartin e avancuar, krahët do të mbulohen nga Jasir Asani dhe Taulant Seferi, ndërsa në sulm do të vendoset Armando Broja.