Fillimet në Arsimin Akademik
Në një takim të hapur me studentët e Universitetit Polis, Artan Dulaku, CEO i Concord Investment, ndau momente nga fillimet e tij si pedagog në Fakultetin e Ekonomisë në vitin 1989.
Ai theksoi rëndësinë e arsimit si një shtyllë për përgatitjen e brezave të rinj duke inkurajuar brezin e ri për t’u investuar në arsimim si baza e formimit të përgjithshëm.
“Pedagogët janë ata që ndihmojnë në formimin e brezit të ri. Ishte një përgjegjësi e madhe dhe një privilegj të jepje mësim në një kohë kur arsimi luante një rol vendimtar.”, përfundoi Ceo i Concord Investment.
Perspektiva mbi Suksesin Akademik
Gjatë bisedës, Dulaku ndau reflektime mbi rëndësinë e suksesit akademik dhe përkushtimin ndaj dijes, duke ndarë për herë të parë me studentët ccelësin e suksesit sipas tij, për të qenë lider në fushat ku të rinjtë aspirojnë.
“Një student i mirë nuk është gjithmonë ai me notat më të larta, por ai që jep maksimumin sipas aftësive të tij. Suksesi vjen nga përkushtimi dhe vullneti për të mësuar.”, u shpreh Dulaku.
Ky mesazh ishte një frymëzim për studentët, duke theksuar rëndësinë e balancimit të dijes teorike me zhvillimin praktik, një bashkim i të dyjave krijon superioritet në tregun e punës.
Një Mesazh për Studentët
I pyetur për këshillat e tij mbi suksesin, Dulaku nënvizoi rëndësinë e adaptimit dhe të mësuarit gjatë gjithë jetës. Njeriu nuk rresht kurrë së mësuari, ndaj mendja e hapur sipas Ceo-s së Concord Investment është mënyra e duhur për të udhëhequr në biznes.
“Universiteti ju mëson disiplinën për të studiuar, por jashtë do të mësoni si të përballeni me sfidat reale. Mendja e hapur dhe aftësia për të përvetësuar të rejat janë armët tuaja kryesore në karrierë.”, përfundoi ai.
Një Udhëtim i Dalluar
Nga një karrierë e suksesshme si pedagog në Fakultetin e Ekonomisë, Artan Dulaku ka avancuar në botën e biznesit, duke u bërë një ndër sipërmarrësit më të njohur në Shqipëri. Ky udhëtim pasqyron rëndësinë e arsimit, përkushtimit dhe aftësisë për t’u përshtatur me ndryshimet, duke qenë një shembull frymëzues për brezin e ri.