Ylli botëror me origjinë shqiptare, Dua Lipa, ka zgjedhur që këtë vit të festojë Pashkët në vendlindjen e saj, në një mënyrë të veçantë dhe mjaft intime. Këngëtarja kaloi fundjavën festive në jug të Shqipërisë, e shoqëruar nga i fejuari i saj, duke shijuar natyrën dhe detin e kristaltë të rivierës shqiptare.
Përmes një postimi të ngrohtë në Instagram, ku ndau momente nga pushimet, ajo shkroi: “Pashkët në shtëpi”, duke lënë të kuptohet se Shqipëria vazhdon të jetë një vend i dashur për të, pavarësisht famës ndërkombëtare.
Në fotot e publikuara, çifti duket i relaksuar dhe i lumtur, teksa lahen në det dhe shijojnë klimën pranverore të jugut shqiptar, larg zhurmës së qyteteve të mëdha.
Kjo vizitë vjen pas disa udhëtimeve të tjera të saj në Shqipëri vitet e fundit, ku ajo jo vetëm që ka promovuar turizmin, por edhe ka treguar krenarinë e saj për rrënjët shqiptare.
Fansat reaguan menjëherë në rrjete sociale, duke e përshëndetur zgjedhjen e saj për të festuar Pashkët në atdhe dhe për të ndarë këto momente me miliona ndjekës.
