Dëgjova disa zhurma dhe hyra në dhomën e Markut”. Me këtë fjali nis rrëfimi i rëndë i Nors Manlapaz, nënës së Mark Samson, 23-vjeçarit filipinas që akuzohet për vrasjen makabre të të resë shqiptare Ilaria Sula, ngjarje që ka tronditur Italinë dhe më gjerë.
E pyetur nga autoritetet italiane, fillimisht Manlapaz pretendoi se nuk kishte dëgjuar asgjë, pasi ishte në gjumë në momentin e krimit. Por pas katër orësh marrje në pyetje, ajo ndryshoi dëshminë. Nën presionin e provave, ajo pranoi se kishte ndihmuar të birin në pastrimin e vendit të krimit.
“Unë e ndihmova djalin tim të pastronte njollat e gjakut në shtëpi”, deklaroi ajo për hetuesit.
Vrasja ndodhi në banesën e Mark Samson në Via Homs, Romë, ku viktima, 22-vjeçarja shqiptare Ilaria Sula, u godit me thikë në fyt për vdekje. Trupi i saj u zhduk për disa ditë, derisa u gjet i braktisur brenda një valixheje në një zonë shkëmbore rreth 40 kilometra larg kryeqytetit italian.
Pikërisht këtu përfshihet edhe roli i nënës. Sipas dyshimeve të prokurorisë, ajo nuk ka ndihmuar vetëm në pastrimin e gjurmëve të gjakut brenda apartamentit, por mund të ketë bashkëpunuar edhe në fshehjen e trupit. Hetuesit po analizojnë mundësinë që ajo ta ketë ndihmuar djalin në mbështjelljen e trupit me një qese të zezë dhe transportimin e tij në valixhe, në vendin ku u gjet.
Dëshmia e nënës është mbështetur nga të dhënat e qelizave telefonike dhe analizat e ADN-së, të cilat tregojnë praninë e saj në pjesë të ndryshme të banesës ku janë zbuluar gjurmë gjaku.
Në rrëfimin e saj, Manlapaz ka pohuar se nuk e kishte pranuar marrëdhënien e të birit me Ilariën, duke theksuar se ajo nuk i përshtatej traditave filipinase. Kjo deklaratë shton edhe më shumë dyshimet mbi rolin e saj në ndihmën pas krimit.
Ndërkohë, Mark Samson e implikoi nënën që në momentin e arrestimit, duke thënë:
“Ishte në shtëpi me mua dhe më ndihmoi të laja gjithçka”.
Më pas, ai u përpoq të ndryshonte versionin, duke pretenduar se kishte vepruar i vetëm.
Babai i autorit, Rik Samson, për momentin nuk është subjekt i hetimeve, pasi ka rezultuar se nuk ndodhej në banesë në momentin e krimit. Por hetuesit nuk përjashtojnë përfshirjen e personave të tjerë, sidomos për transportimin e trupit dhe tentativat për të fshirë gjurmët.
Autoritetet italiane janë duke verifikuar gjithashtu lëvizjet e autorit përmes celularit të viktimës, të cilin ai e mbajti për një javë pas vrasjes. Të dhënat e mbledhura nuk përputhen me dëshmitë e tij, çka e thellon më tej misterin dhe ngre dyshime mbi bashkëpunëtorë të mundshëm.