Donald Trump mori pjesë në tre evente të ndryshme pas betimit të tij, sigurisht me Zonjën e Parë të SHBA-ve, Melania, në krah. Ata vallëzuan së bashku në një ballo duke festuar rikthimin e tij në Shtëpinë e Bardhë. Çifti u shfaq për herë të parë në mbrëmjen e betimit me kodin e veshjes që ishte “ushtarak”.
Pasi u larguan nga atje, ata shkuan në Liberty Ball me anëtarët e tjerë të familjes së tyre dhe nata u mbyll me paraqitjen e tyre në Starlight Ball.
Ashtu siç ndodhi në mandatin e parë të Trump, komunikimi i çiftit si dhe gjuha e trupit të tyre ishin nën “mikroskopin” e mediave. Daily Mail raportoi për një shkëmbim të vogël që Trump pati me Melanian në ballon e parë pas betimit të tij, kur ai e pyeti nëse ajo ndjen erën e parfumit të tij dhe ajo pohon.
Mirëpo, dialogu që çifti pati teksa kërcenin në eventin e dytë të mbrëmjes, Liberty Ball, ishte më i interesuar për mediat. Mirror madje shkoi aq larg sa të angazhonte një ekspert të leximit të buzëve për të zbuluar se çfarë po i thoshte Donald Trump Melania-s, ndërsa të dy lëkunden “në mënyrë të sikletshme” në pistën e kërcimit, sipas mediave britanike.
Në atë ballo, presidenti 78-vjeçar u shfaq me kostum dhe kërceu me ish-modelen 54-vjeçare nën melodinë e “Himnit të Betejës së Republikës”.
Duke folur për Mirror, eksperti i leximit të buzëve Jeremy Freeman pretendon se ka deshifruar bisedën e tyre.
“Sot është një ditë që nuk do ta harrojmë kurrë”, i pëshpëriti fillimisht Melania në vesh Trump, sipas Freeman.
“Ke të drejtë, do të mësoj, do të luftoj”, thuhet se i është përgjigjur presidenti republikan, ndërsa gruaja e tij i ka thënë: “Unë jam këtu për ty”.
“Do të shohim. Do ta kontrolloni dot punën? Do të keni vështirësi?”, pyeti ai.
“Përgjigjja është jo”, tha Melania, ndërsa bashkëshorti i saj u përgjigj se e kuptonte.