Biznesmeni 49-vjeçar i njohur në Shqipëri për aktivitetet e tij në industrinë e lojërave të fatit, Ardit Kraja, është arrestuar mbrëmjen e sotme në Kosovë. Arrestimi u bë teksa ai po kalonte pikën kufitare në Vërmicë dhe, pas kontrollit, u zbulua se për të ekzistonin dy urdhërarrest nga gjykatat në Kosovë, konkretisht nga Gjykata Themelore në Prizren dhe Gjykata Themelore në Mitrovicë. Akuzat ndaj tij lidhen me dyshimet për përfshirjen në organizimin e skemave piramidale dhe lojërave të fatit të paligjshme.
Pas arrestimit, Gjykata e Mitrovicës vendosi që Kraja të mbahet në paraburgim për 48 orë deri sa të paraqitet para gjyqit për të marrë masën e sigurisë. Sipas informacioneve të marra nga “Gazeta Insajderi”, bazuar në burime pranë hetimit, Kraja është gjithashtu i dyshuar për aktivitete të paligjshme të organizimit të bixhozit në Suharekë, çka është në juridiksionin e Gjykatës së Prizrenit, si dhe një rast tjetër në Mitrovicë. Kraja, sipas raportimeve, ofronte një platformë online për lojërat e fatit në Kosovë, duke përfshirë linket dhe kodet për përdorim dhe madje duke investuar në bizneset e lojtarëve të tij. Ai merrte përsipër humbjet e lojtarëve, ndërsa fitimet e ndante me ta, duke ruajtur 60 për qind të tyre për veten.
Ky biznesmen është njohur si një nga ofruesit kryesorë të shërbimeve të paligjshme të bixhozit në Kosovë, një aktivitet që është ndaluar në vend për disa vite. Raportimet në media nuk kanë munguar as për aktivitetet e tij në Shqipëri, përfshirë edhe përplasjet me figura të tjera në tregun e lojërave të fatit, si dhe për jetën e tij personale, përfshirë lidhjen me moderatoren Ilda Bejleri, me të cilën formon një çift dhe janë prindër të një vajze me emrin Siena.
Burimi i artikullit: https://insajderi.org/
Burimi i fotos: https://www.instagram.com/p/C3NbOxIsEeC/