Në aktivitetin e dates 10 mars, për krijimin dhe funksionimin e dritares së vetme kombëtare për doganat në Shqipëri, ministrja e Ekonomisë dhe Inovacionit, Delina Ibrahimaj tha se po përmbyllet faza e dytë e një projekti mjaft të rëndësishëm.
Bëhet fjalë për një platformë digjitale që ka të bëjë me mënyrën se si bizneset shqiptare bëjnë tregti.
“Lehtësimi i tregtisë si nevojë që ne kemi për procesin e anëtarësimit të vendit në BE”, tha ajo, duke vënë theksin te fakti se “jemi vend tranzit”.
“Uroj të mbarojë sa më shpejt implementimi i sistemit. Pas disa vitesh, Shqipëria do jetë 100% e integruar me tregjet europiane dhe uroj shumë që pikat tona kufitare të jenë konkurrente me ato të Europës. Shqipëria të ketë edhe logjistikën burokratike sa më të thjeshtë dhe të mirë”, deklaroi ajo.
Me këtë sistem, pritet të eliminohen radhët e gjata në pikat doganore.
“Pa patur nevojë për letra fizike, për dokumente, me një letërnjoftim digjital tregtar, shkëmbyes mallrash, individë, mund do të mund të lëvizin së shpejti të lirë dhe me reduktim thuajse në zero të kohës së tyre përgjatë gjithë rajonit”, paralajmëroi zv.ministri Endrit Yzeiraj.
Ndërkohë, drejtori i Doganave, Besmir Beja, u shpreh se “ky sistem është pikë e re kthese”.
“Me një aplikim, nëpërmjet sistemit, do të mund të shqyrtojmë të gjithë dokumentacionin dhe do të mund të operojmë në mënyrë sa më të shpejtë për t’ju përgjigjur kërkesave për import apo eksport mallrash”, tha ai, duke shtuar se Doganat fitojnë një instrument të rëndësishëm verifikimi.
Platforma NSW parashikon krijimin e një sistemi të vetëm elektronik për paraqitjen dhe shkëmbimin e të dhënave të tregtisë ndërkombëtare, duke integruar institucionet që lëshojnë dokumente, leje dhe certifikata për procedurat e importit dhe eksportit.
Në Shqipëri, sistemi do të menaxhohet nga Agjencia Kombëtare e Shoqërisë së Informacionit (AKSHI) dhe do të integrohet me platformën e-Albania, ndërsa Drejtoria e Përgjithshme e Doganave është institucioni lider për zbatimin e tij.
Zbatimi i National Single Window synon të:
• thjeshtojë procedurat e tregtisë ndërkombëtare
• ulë kostot administrative për biznesin
• përshpejtojë procedurat e zhdoganimit
• përmirësojë koordinimin ndërinstitucional
• rrisë transparencën dhe integritetin në proceset doganore
Ky sistem kontribuon gjithashtu në përafrimin e procedurave doganore me standardet e Bashkimit Europian, duke mbështetur procesin e integrimit europian dhe duke rritur konkurrueshmërinë e bizneseve shqiptare në tregjet ndërkombëtare.
Përmes këtij sistemi pritet:
• reduktimi i burokracisë dhe dokumentacionit
• përshpejtimi i procedurave të importit dhe eksportit
• rritja e parashikueshmërisë së proceseve tregtare
• ulja e kostove të transaksioneve për biznesin.