Mbrëmjen e kaluar, këngëtarja Fifi ishte e ftuar në emisionin “Pardon My French”, ku zbuloi detaje të jetës, karrierës dhe suksesit që ka arritur gjatë viteve. Por ajo nuk u ndal vetëm te arritjet. Fifi ndau edhe disa sekrete të albumit të ri dhe rrëfeu mendimet e saj mbi presionin e industrisë muzikore.
Pyetja ishte e thjeshtë: A është më shumë kënaqësi për Fifin të publikojë një këngë apo ndjen presion nga klikimet dhe viraliteti?
Fifi pranoi se ka ndjerë presionin, por ka arritur të kalojë këtë fazë duke vendosur të bëjë muzikë për veten e saj:
“Duhet vetëm të krijoj muzikë. Që prej këngës ‘Zemrën’ kam thënë që do të publikoj dhe të bëj vetëm muzikë që mua më pëlqen dhe të mos them vetëm ‘të bëj një hit’. Kush është hit dhe kush jo? Unë nuk e di. Kur kam bërë këngët më të bukura të jetës sime, kam thënë që dua të bëj një këngë të mirë që njerëzit të më dëgjojnë mua.”
Artistja shtoi se ka vendosur të rikthehet tek ajo që e ndjen më shumë: muzikë autentike, e ndjerë dhe jo e influencuar nga rrymat apo artistët e tjerë.
Fifi gjithashtu tregoi mënyrën se si dëgjon këngët e saj para publikimit:
“Këngët e mia unë nuk i hap t’i dëgjoj, përveç këngëve të reja që nuk kanë dalë ende. I dëgjoj në momente të ndryshme për të parë nëse më japin emocionin e njëjtë. A ja vlejnë apo jo.”
Ky moment reflektimi tregon se Fifi është e vendosur të rikthejë muzikën tek ajo që e bën të ndjejë pasion dhe kënaqësi, duke lënë pas presionin e klikimeve dhe trendet e përkohshme.