Vala e të nxehtit po përhapet me intensitet të lartë në Evropë, duke shkaktuar shqetësime të mëdha për shëndetin publik. Rekordin e temperaturave e mban Spanja, ku në Barcelonë janë regjistruar temperatura deri në 45 gradë Celsius. Në Paris, Tour Eiffel u mbyll dje për të garantuar sigurinë e turistëve, për shkak të temperaturave shumë të larta.
Në Itali po ndërmerren masa për mbrojtjen e punëtorëve që janë të detyruar të punojnë jashtë në kushtet e temperaturave ekstreme. Deri tani, 13 rajone kanë miratuar urdhrin që ndalon punën në ambient të hapur gjatë orëve më të nxehta të ditës.
Firence mban rekordin në Itali me shtatë alarme të kuqe për valët e nxehtësisë që kanë nisur që nga 12 qershori. Ky fenomen përfshin periudha të gjata me temperatura shumë të larta, lagështi të lartë, rrezatim intensiv diellor dhe mungesë të ventilimit. Gjatë dy ditëve të fundit, termometri në Firence ka shënuar deri në 40.5 gradë Celsius.
Situata më kritike është në Spanjë, ku në muajin qershor kanë humbur jetën 43 persona për shkak të nxehtësisë, shifra më e lartë që prej vitit 2022. Vdekjet u regjistruan kryesisht mes 22 dhe 30 qershorit, në kulmin e temperaturave. Nga viktimat, 22 ishin gra dhe 21 burra, shumica mbi 65 vjeç, ndërsa vetëm një vdekje ndodhi në grupmoshën 45-65 vjeç. Në rajonin e Katalonjës u regjistruan më së shumti viktima, ndjekur nga Galicia me 77 të vdekur, Andaluzia me 48 dhe Madridi me 52.
Edhe Franca përballet me situatë të rëndë. Aktualisht, në katër departamente është ende në fuqi alarmi i kuq për nxehtësinë, ndërsa në 55 departamente ka alarm të portokalltë, sipas të dhënave të fundit të Météo France. Për rajonin e Parisit, niveli i alarmit është portokall.
Në Itali dhe në vendet e tjera, ndërprerjet e energjisë elektrike po shtohen, duke krijuar vështirësi jo vetëm për familjet, por edhe për sektorin e gastronomisë dhe bizneset e tjera.
Parashikimet për ditën e sotme njoftojnë një mot jashtëzakonisht të nxehtë, me temperatura që do të arrijnë deri në 37-40 gradë në shumë rajone. Disa stuhi të shkurtra priten në zonat malore të Alpeve dhe më pas mund të shtrihen në pjesën veriore të fushave, veçanërisht në veri-perëndim. Nuk përjashtohen edhe reshjet e breshrit.